FAQs


Tge èn "tradiziuns vivas"?
Las "tradiziuns vivas" èn noss patrimoni cultural immaterial. Il patrimoni cultural immaterial cumpiglia las tradiziuns e praticas che vegnan dadas vinavant d'ina generaziun a la proxima ed ans dattan in sentiment d'identitad e da cuntinuitad. Da quest patrimoni fan part per exempel las paraulas e ditgas, la musica ed il saut, ils usits e las festas, ma er la savida tradiziunala. Il patrimoni cultural immaterial è fitg varià e multifar ed èn cuntrast cun il patrimoni cultural material sa transfurma el constantamain.

Tge è la glista da las tradiziuns vivas en Svizra?
La glista da las tradiziuns vivas en Svizra cuntegna 167 elements represchentativs dal patrimoni cultural immaterial che derivan da tut las regiuns da noss pajais. L'inventari cuntegna tradiziuns che han ina impurtanza speziala en Svizra a nivel local, regiunal u naziunal e che derivan dals champs musica, saut, teater, usits, artisanat, industria u che han ina relaziun cun la savida davart la natira e l'ambient. La Svizra è sa impegnada da rediger questa glista ratifitgond la Convenziun da l'UNESCO per la preservaziun dal patrimoni cultural immaterial.

Pertge fai senn da rediger ina tala glista?
Quai che duai vegnir preservà sto l'emprim vegnir identifitgà e documentà. L'inventarisaziun dal patrimoni cultural immaterial è perquai in element central da la convenziun da l'UNESCO. Quai pussibilitescha d'intermediar e promover effectivamain ils elements da quest patrimoni. Ultra da quai è l'inventarisaziun ina cundiziun per che tschertas da questas tradiziuns possian vegnir integradas en las glistas da l'UNESCO ("Glista represchentativa dal patrimoni cultural immaterial da l'umanitad" e "Glista dal patrimoni cultural che sto vegnir preservà urgentamain")

Gida questa glista er a promover las tradiziuns vivas?
Il patrimoni cultural immaterial viva mo uschè ditg che las tradiziuns vegnan pratitgadas ed han in senn per las persunas che las realiseschan. Perquai pon las mesiras per preservar quest patrimoni adina mo esser indirectas. Ellas han la finamira dad intermediar ina conscienza per la valur da las tradiziuns vivas. La glista permetta da sensibilisar vastas parts da la populaziun per l'impurtanza da las tradiziuns vivas ed ella gida a valurisar las persunas che vivan e mantegnan questas tradiziuns.

En tge relaziun stat la glista da las tradiziuns vivas cun las glistas da l'UNESCO?
Ils stadis contractants da la convenziun da l'UNESCO èn obligads d'inventarisar il patrimoni cultural immaterial sin lur territori. Cun la glista da las tradiziuns vivas ademplescha la Svizra questa obligaziun a nivel federal. Divers chantuns han fatg il medem a nivel chantunal. L'UNESCO maina a nivel internaziunal ina "Glista represchentativa dal patrimoni cultural immaterial da l'umanitad" ed ina "Glista dal patrimoni cultural che sto vegnir preservà urgentamain". L'inventarisaziun sin ina glista svizra n'è betg cumparegliabla cun l'inventarisaziun sin ina glista da l'UNESCO, ma ella è ina cundiziun per nominar ina tradiziun per ina glista internaziunala

Tgi ha redigì la glista da las tradiziuns vivas?
La glista actuala sa basa sin propostas dals chantuns. La fin da matg 2011 ha l'Uffizi federal da cultura preschentà las 387 tradiziuns vivas ch'ils uffizis chantunals han proponì per l'inventarisaziun sin la glista naziunala.

Liste der lebendigen Traditionen in der Schweiz: Eingaben der Kantone (Stand 31.05.2011)

Ultima modificaziun: 28.04.2012
Dimensiun: 287 kb
Tip: PDF


Ina gruppa da project sut la batgetta da l'Uffizi federal da cultura ha evaluà e giuditgà questas propostas. Represchentantas e represchentants da l'administraziun federala, dals chantuns, da la Cumissiun svizra da l'UNESCO, da Pro Helvetia e da la scienza han fatg part da questa gruppa da project. La tscherna definitiva da 167 tradiziuns [link] è vegnida publitgada suenter l'evaluaziun tras ils chantuns l'october 2011. Questas lavurs èn vegnidas coordinadas da l'Universitad da Lucerna per incumbensa da l'Uffizi federal da cultura.

Finalisierte Auswahl für die Liste der lebendigen Traditionen in der Schweiz

Ultima modificaziun: 07.09.2012
Dimensiun: 149 kb
Tip: PDF


Cura e co vegn la glista actualisada?
Il patrimoni cultural immaterial sto pudair sa sviluppar per restar viv. Perquai sto er la glista da las tradiziuns vivas pudair sa midar - quai pretenda la convenziun da l'UNESCO. Ulteriuras tradiziuns ston vegnir integradas periodicamain en la glista, ed autras tradiziuns, che na correspundan pli als criteris, ston vegni eliminadas. La maniera e la periodicitad da l'actualisaziun vegnan definidas suenter ina evaluaziun da la fasa da pilot en consens cun ils uffizis da cultura chantunals.

Co pon ins proponer ulteriuras tradiziuns per la glista?
Propostas per ulteriuras tradiziuns che duain medemamain vegnir integradas en la glista pon ins far cur ch'ins less cun il formular da contact. Cur che la glista vegn actualisada, vegnan questas propostas evaluadas.

Pon ins trametter ulteriur material audiovisual per la glista?
Material audiovisual (fotografias, documents sonors, films) che sustegna l'illustraziun da las tradiziuns vivas inventarisadas pon ins trametter cul formular da contact.

 

Co s'engascha la Confederaziun en l'avegnir per las tradiziuns vivas?
La redacziun da la glista fa part dal champ prioritar da promoziun "tradiziuns vivas" da la Confederaziun. L'Uffizi federal da cultura, Pro Helvetia, la Biblioteca naziunala ed il Museum naziunal intermedieschan cun divers projects l'impurtanza da las furmas culturalas regiunalas e tradiziunalas per la vita sociala ed artistica en Svizra.