Infurmaziuns


La glista da las tradiziuns vivas

Il tschaiver da Basilea, la grafica svizra, il chalandamarz u la festa da vendemia – tut questas tradiziuns èn inventarisadas en la «Glista da las tradiziuns vivas en Svizra».

Tut las tradiziuns inventarisadas han las caracteristicas suandantas:

  • Ellas vegnan pratitgadas oz en Svizra.
  • Ellas fan part da nossa diversitad culturala e da nossa identitad.
  • Ellas sa transfurman e vegnan adattadas.

Grazia a questas caracteristicas reuneschan las tradiziuns vivas – che vegnan er numnadas patrimoni cultural immaterial – a giuven e vegl ed ellas promovan il stgomi: a la fiera da tschagulas a Berna sa scuntran per exempel tut las generaziuns, persunas da la citad e da la champagna, indigens ed esters per onurar la tschagula e far festa ensemen.

Il context
Las tradiziuns vivas èn noss patrimoni cultural immaterial. Ratifitgond la Convenziun da l'UNESCO per la preservaziun dal patrimoni cultural immaterial (ils 16 d'october 2008) ha la Svizra suttastritgà l'impurtanza da las tradiziuns vivas. La Svizra è sa impegnada dad inventarisar las tradiziuns vivas en Svizra e dad actualisar periodicamain questa glista.

Las finamiras
La «Glista da las tradiziuns vivas en Svizra» duai cuntegnair ils elements represchentativs dal patrimoni cultural immaterial da tut las regiuns dal pajais. Ella contribuescha a

  • la sensibilisaziun da la populaziun per l'impurtanza da la realisaziun e da l'intermediaziun da las tradiziuns vivas;
  • la valurisaziun e renconuschientscha da las persunas che vivan e promovan las tradiziuns vivas;
  • la furmaziun d'iniziativas e da partenadis che sustegnan las tradiziuns vivas.

Il proceder
La Confederaziun ed ils chantuns han dividì las incumbensas da l'inventarisaziun. Ils chantuns èn responsabels per il cuntegn da la glista, per l'identificaziun ed inventarisaziun da las tradiziuns vivas da lur territori. La Confederaziun ha coordinà questa lavur. La tscherna da las tradiziuns en l'emprima runda 2011/2012 è vegnida realisada suandantamain:

  1. Mintga chantun ha ramassà en in emprim pass propostas per la glista da las tradiziuns vivas en Svizra.
  2. In gremi dals incumbensads chantunals per la cultura, da represchentantas e represchentants da l'administraziun federala e d'expertas ed experts ha tschernì tranter las propostas quellas tradiziuns che duain vegnir inventarisadas en la glista da las tradiziuns vivas. La tscherna è vegnida evaluada dals chantuns.
  3. L'atun 2012 ha la Confederaziun publitgà la «Glista da las tradiziuns vivas en Svizra» cun material audiovisual per mintga tradiziun sin la pagina d'internet www.tradiziuns-vivas.ch. Questa glista vegn actualisada periodicamain.
Finalisierte Auswahl für die Liste der lebendigen Traditionen in der Schweiz

Ultima modificaziun: 07.09.2012
Dimensiun: 149 kb
Tip: PDF